நீங்கள் தேடியது "கூடுதல் போலீஸ் பாதுகாப்பு"

நெல்லை:

144 ஆண்டுகளுக்கு ஒருமுறை கொண்டாடக் கூடிய தாமிரபரணி மகா புஷ்கர விழா இந்த ஆண்டு கடந்த 11-ந்தேதி தொடங்கி நடந்து வருகிறது. பல்வேறு ஆன்மீக அமைப்புகள், பொதுமக்கள் சார்பாக தாமிரபரணியில் பாபநாசம் தொடங்கி புன்னக்காயல் வரை 64 தீர்த்தக்கட்டங்களிலும் இந்த விழா நடக்கிறது. இதில் நாடுமுழுவதும் இருந்து ஏராளமான பக்தர்கள் கலந்து கொண்டு ஆற்றில் புனித நீராடி வருகிறார்கள்.

புஷ்கர விழாவின் 5-வது நாளான இன்று அதிகாலையிலேயே ஆற்றில் பக்தர்கள் குவிந்தனர். ஆற்றில் புனித நீராடி வழிபாடு செய்தனர். பாபநாசம் தாமிரபரணி ஆற்றில் இன்று பக்தர்கள் கூட்டம் அதிகமாக இருந்தது. பல்வேறு பகுதிகளில் இருந்து வந்த பக்தர்கள் அங்குள்ள இந்திர கீல தீர்த்தம், திரி நதி சங்கம தீர்த்தம், அகஸ்தியர் அருவி போன்ற இடங்களில் புனித நீராடினர்.

இதேபோல் அம்பை, கல்லிடைகுறிச்சி, அத்தாள நல்லூர், சேரன்மகாதேவி, திருப்புடைமருதூர், முக்கூடல், கோடகநல்லூர், பழவூர், நெல்லை குறுக்குத் துறை, தைப்பூச மண்டபம், வண்ணார்பேட்டை, அருகன்குளம், முறப்பநாடு, ஸ்ரீவைகுண்டம், ஆத்தூர் படித்துறைகளிலும் இன்று காலையில் இருந்தே ஏராளமான பக்தர்கள் ஆற்றில் புனித நீராடி வழிபாடு செய்தனர்.

அகில பாரதிய துறவியர்கள் சங்கம் சார்பாக பாபநாசத்தில் நடந்து வரும் புஷ்கர விழாவில் இன்று காலை கணபதி ஹோமம் நடைபெற்றது. இதையடுத்து தாமிரபரணியில் சுவாமி ஐயப்பனுக்கு நீராட்டு நடைபெற்றது. இதை தொடர்ந்து அங்குள்ள சேனைத்தலைவர் திருமண மண்டபத்தில் ஐயப்ப பக்தர்கள் மாநாடு நடைபெற்றது.

இதேபோல் சித்தர்கள் கோட்டம் சார்பாக பாபநாசம் திரிநதி சங்கம தீர்த்தத்தில் இன்று காலை சிறப்பு வேள்வி நடைபெற்றது. தொடர்ந்து ஆற்றில் வழிபாடுகள் நடந்தன. காஞ்சி சங்கரமடம் சார்பாக திருப்புடை மருதூரில் நடைபெற்ற புஷ்கர விழாவில் இன்று காலை மிருத்யுஞ்சய ஹோமம் நடந்தது. இதில் திரளான பக்தர்கள் கலந்து கொண்டார்கள்.

நெல்லை குறுக்குத்துறை சுப்பிரமணியசுவாமி கோவில் படித்துறையில் இன்று காலை சிறப்பு ஹோமங்கள் நடைபெற்றன. தொடர்ந்து தேவார இன்னிசை, வேதபாராயணம் நடைபெற்றது. நெல்லை தைப்பூச மண்டபம் முன்புள்ள படித்துறையில் இன்று காலை ராஜமாதங்கி ஹோமம் நடந்தது. தொடர்ந்து தாமிரபரணியில் வழிபாடுகள் நடந்தன. சங்கீத சபாவில் பன்னிரு திருமுறை பாராயணம் நடந்தது.

அருகன்குளம் எட்டெழுத்து பெருமாள் கோவில் கோசாலையில் இன்று காலை சிறப்பு ஹோமம் நடந்தது. 50-க்கும் மேற்பட்ட வேத பண்டிதர்கள் கலந்துகொண்டு ஹோமம் நடத்தி தாமிரபரணிக்கு வழிபாடு செய்தனர்.

தூத்துக்குடி மாவட்டம் முறப்பநாடு கைலாசநாதர் கோவில் படித்துறையில் இன்று நடந்த சிறப்பு வழிபாட்டில் திரளான பக்தர்கள் கலந்து கொண்டனர். இன்றும் இந்த படித்துறையில் வழக்கத்தை விட அதிக கூட்டம் காணப்பட்டது. ஆண்களும், பெண்களும் ஏராளமானோர் படித்துறையில் புனித நீராடி குரு ஸ்தலமான கைலாசநாதர் கோவிலில் சாமி தரிசனம் செய்தார்கள்.

ஸ்ரீவைகுண்டம் படித்துறையில் இன்று காலை கண் திருஷ்டி, பயம், தொல்லைகள், வம்பு வழக்குகள் மற்றும் சாபங்களை நீக்கும் ஸ்ரீமகா சுதர்சன ஹோமங்கள் நடைபெற்றன. இதில் திரளான பக்தர்கள் பங்கேற்று தாமிரபரணியில் புனித நீராடி வழிபட்டனர்.

புஷ்கர விழா நடந்துவரும் அனைத்து இடங்களிலும் பக்தர்கள் பாதுகாப்புக்காக ஆற்றில் தீயணைப்பு மற்றும் நீச்சல் வீரர்கள் ரப்பர் படகுகள் மற்றும் பாதுகாப்பு சாதனங்களுடன் நிறுத்தப்பட்டுள்ளனர். படித்துறைகளில் போலீசார் பாதுகாப்புக்கு நிறுத்தப்பட்டுள்ளார்கள். #ThamirabaraniPushkaram

திருச்சி:

தமிழக கவர்னர் பன்வாரிலால் புரோகித் திருச்சி, புதுக்கோட்டை, தஞ்சை நிகழ்ச்சிகளில் பங்கேற்க 2 நாள் சுற்றுப்பயணமாக நேற்று காலை ரெயிலில் திருச்சி வந்தார். புதுக்கோட்டையில் நடைபெற்ற தூய்மை இந்தியா திட்டத்தில் பங்கேற்ற அவர் அங்கு மருத்துவக்கல்லூரி மருத்துவமனையில் தாய்மார்களுக்கு அம்மா குழந்தைகள் நல பரிசு பெட்டகத்தினை வழங்கினார்.

புதுக்கோட்டைமாவட்ட நிகழ்ச்சிகளை முடித்துக் கொண்டு மாலை 5 மணிக்கு கார் மூலம் கவர்னர் பன்வாரிலால் புரோகித் திருச்சிக்கு புறப்பட்டார். திருக்கோகர்ணம் அருகே முத்துடையான்பட்டி என்ற கிராமம் அருகில் கவர்னர் கார் வந்த போது, எதிரே திருச்சியில் இருந்து புதுக்கோட்டை நோக்கி அரசு பஸ் வந்தது.

திடீரென எதிர்பாராத விதமாக அரசு பஸ் கவர்னர் காரின் வலது பக்க கதவில் மோதியது. இதில் கார் பாகங்கள் உடைந்து ரோட்டில் விழுந்தன. அதிர்ஷ்டவசமாக காருக்குள் இருந்த கவர்னர் மற்றும் அவரது கார் டிரைவர் ஆகியோர் காயமின்றி உயிர் தப்பினர். உடனடியாக பாதுகாப்பு அதிகாரிகள் கவர்னரை பின்னால் வந்த காரில் ஏற்றி, பாதுகாப்பாக திருச்சிக்கு அனுப்பி வைத்தனர்.

கவர்னர் காருக்கு முன்னும் பின்னும் போலீஸ் பாதுகாப்பு வாகனங்கள் சென்ற நிலையில் அரசு பஸ் மோதியது பெரும் பரபரப்பை ஏற்படுத்தியது. இது குறித்து தமிழக அரசின் தலைமை செயலக அதிகாரிகள் தீவிர விசாரணை நடத்த உத்தரவிட்டனர்.

அரசு பஸ்சை ஓட்டி வந்த சிவகங்கை மாவட்டம் ஒக்கூரை சேர்ந்த டிரைவர் விஜயசுந்தரத்தை போலீசார் கைது செய்தனர். விசாரணையில் அவர் தனக்கு முன்னால் சென்ற கல்லூரி பஸ்சை முந்த சென்றபோது எதிர்பாராத விதமாக கவர்னர் கார் மீது மோதிவிட்டதாக கூறினார்.

அவரை நீதிமன்றத்தில் ஆஜர்படுத்திய போலீசார் பிறகு புதுக்கோட்டை சிறையில் அடைத்தனர். இது தொடர்பாக விசாரணை அதிகாரிகள் தலைமை செயலகத்தில் அறிக்கை தாக்கல் செய்ய உத்தரவிடப்பட்டுள்ளது.

கவர்னர் கார் மீது மோதிய அரசு பஸ்சை ஓட்டி வந்த விஜய சுந்தரம் தி.மு.க. தொழிற் சங்கத்திலும் பொறுப்பில் உள்ளார் என்பதால் கூடுதல் பரபரப்பு ஏற்பட்டுள்ளது. தமிழகத்தில் சுற்றுப்பயணம் செய்து ஆய்வு நடத்தி வரும் கவர்னருக்கு தி.மு.க.வினர் அனைத்து இடங்களிலும் கருப்பு கொடி காட்டி எதிர்ப்பு தெரிவித்து வருகின்றனர்.

நேற்று புதுக்கோட்டையிலும் கவர்னருக்கு தி.மு.க.வினர் கருப்பு கொடி காட்டி எதிர்ப்பு தெரிவித்தனர். இதில் 500 பேர் கைது செய்து சிறையில் அடைக்கப்பட்டிருந்தனர். இவற்றையெல்லாம் கடந்து நிகழ்ச்சிகளில் பங்கேற்று திருச்சிக்கு திரும்பிய போது தான் இந்த விபத்து நடந்துள்ளது.

நேற்று இரவு திருச்சி வந்த கவர்னர் பன்வாரிலால் புரோகித் சுற்றுலா மாளிகையில் தங்கினார். இன்று காலை 10 மணிக்கு திருச்சி சங்கம் ஓட்டலில் நடைபெற்ற உயிருக்கு உறுதிமொழி என்ற உடலுறுப்பு தானம் விழிப்புணர்வு நிகழ்ச்சியில் பங்கேற்றார்.

அதன்பிறகு தஞ்சையில் நடைபெறும் பல்கலை கழக விழாவில் பங்கேற்க கார் மூலம் தஞ்சை புறப்பட்டு சென்றார். மாலை 4.30 மணிக்கு மீண்டும் கார் மூலம் திருச்சி வரும் கவர்னர் விமானம் மூலம் சென்னை புறப்பட்டு செல்கிறார். நேற்று நடைபெற்ற எதிர்பாராத விபத்து சம்பவத்தை தொடர்ந்து திருச்சியில் இன்று கவர்னர் பங்கேற்ற நிகழ்ச்சிகள், சென்ற இடங்கள் ஆகியவற்றிற்கு கூடுதல் போலீஸ் பாதுகாப்பு போடப்பட்டிருந்தது.

கவர்னர் கார் செல்லும் போது அச்சாலையில் மற்ற வாகன போக்குவரத்து நிறுத்தப்பட்டது. மாநகர போலீஸ் கமி‌ஷனர் அமல்ராஜ் தலைமையில் போக்குவரத்து போலீசார் வாகன போக்குவரத்தை ஒழுங்குபடுத்தினர்.  #TNGovernor #Banwarilalpurohit